Një i ri ka shkuar mëngjesin e sotëm në komisariatin e policisë së Shkodrës për të bërë një denoncim, ku ka pretenduar se mbrëmjen e kaluar është kërcënuar nga disa persona të paidentifikuar.
Sikur raporton policia, Arlind Bushati djali i Xhemal Bushatit, ky i fundit ish-kandidat i Lulzim Bashës për Bashkinë Shkodër, është parqitur në komisariat rreth orës 09:30, duke pretenduar se mbrëmjen e djeshme rreth orës 22:30 është kërcënuar nga disa persona të panjohur.
Kërcënuesit ishin duke udhëtuar me një motomjet, dhe sipas pretendimeve kur i janë afruar 32-vjeçarit në afërsi të një lokali në pedonalen e qytetit, i kanë drejtuar atij një send që mendohet të jetë armë.
Pas kësaj personat e panjohur janë larguar nga vendi i ngjarjes, ndërsa policia ka nisur verifikimin e kamerave të sigurisë për të zbuluar se kush janë personat në fjalë dhe si qëndron e vërteta e këtij rasti.
“Më datë 11.10.2024, në orën 09:30, shtetasi A. B., 32 vjeç, ka kallëzuar se mbrëmjen e djeshme, rreth orës 22:30, persona të paidentifikuar që qarkullonin me një motomjet, i kanë drejtuar një send, në dukje armë zjarri, afër një lokali në pedonalen e Shkodrës”, thuhet në njoftimin e policisë.
