Katër persona janë vrarë ndërsa dhjetëra të tjerë janë plagosur përgjatë natës në Kiev, si pasojë e sulmeve me raketa dhe dronë, ka bërë të ditur kryetari i qytetit, Vitali Klitschko më 6 qershor.
“Katër persona janë konfirmuar të vdekur në kryeqytet. Operacionet për kërkim-shpëtim janë duke vazhduar në disa lokacione”, ka bërë të ditur Klitschko në Telegram.
Sulmet intensive kanë zgjatur disa orë dhe raportohet të jenë kryer me raketa lundruese dhe dronë kamikazë. Tymur Tkachenko, shef i departamentit ushtarak, ka thënë se dronët kanë goditur katet e një ndërtese të lartë në anën lindore të qytetit, dhe për pasojë ka shpërthyer zjarri.
Presidenti ukrainas, Volodymyr Zelensky e ka dënuar sulmin masiv me dronë, që ka prekur shumë rajone të shtetit.
“Rusia nuk del nga vijat e saj – një tjetër sulm masiv në qytete dhe përditshmërinë e njerëzve”, ka thënë Zelensky. Ai ka shtuar se në sulme janë përfshirë mbi 400 dronë dhe më shumë se 40 raketa, përfshirë ato balistike.
Sipas Zelenskyt, 49 njerëz janë plagosur, ndonëse numri mund të rritet. Në mesin e të vrarëve janë tre zjarrfikës – Pavlo Yezhor, Danylo Skadin dhe Andriy Remenniy – të cilët kanë qenë duke punuar nën rrënoja për t’iu ndihmuar njerëzve.
Zelensky i ka bërë thirrje komunitetit ndërkombëtar, sidomos Shteteve të Bashkuara dhe Evropës, që të kenë përgjigje më të ashpër.
“Nëse dikush nuk është duke rritur presionin dhe po ofron kohë që të humbin edhe më shumë jetë njerëzish, ajo është bashkëfajësi. Na duhet të veprojmë me vendosmëri”, ka thënë ai.
Presidenti amerikan, Donald Trump ka thënë më 4 qershor se presidenti rus, Vladimir Putin e ka paralajmëruar se Rusia do të përgjigjej për sulmet që janë kryer në hapësirat e forcës ajrore ruse, duke rezultuar me shkatërrim të dhjetëra bombarduesve rusë me kapacitet bërthamor.Shërbimi ukrainas i Sigurisë (SBU) e ka kryer sulmin më 1 qershor, dhe më pas ka deklaruar se janë goditur më shumë se 40 bombardues.Trump ka biseduar me Putinin përmes telefonit dhe e ka përshkruar thirrjen si “bisedë të mirë”, ndonëse e ka përmendur se nuk ishte e llojit që do të çonte në paqe të menjëhershme. Presidenti amerikan ka thënë se sulmet e befasishme ukrainase kanë qenë njëra prej temave të diskutimit.
“Kemi diskutuar sulmin në aeroplanët rusë nga ana e Ukrainës dhe disa sulme tjera që janë kryer nga të dyja palët”, ka thënë Trump.
Ai është takuar me kancelarin gjerman, Friedrich Merz të enjten në Shtëpinë e Bardhë, për të biseduar për bashkëpunimin për Ukrainën dhe tema tjera.
Merz, i cili ka nisur detyrën e kancelarit muajin e kaluar, u ka thënë gazetarëve para nisjes së takimit se nuk pret që do të ketë një rezultat shumë të madh lidhur me çështjen e tarifave, NATO-s apo luftës në Ukrainë. Mirëpo, pas takimit, ai ka deklaruar se është “jashtëzakonisht i kënaqur”.
Merz ka thënë se Shtetet e Bashkuara dhe Gjermania pajtohen “sa e tmerrshme është lufta”, duke e bërë fajtor Putinin, dhe duke theksuar se Gjermania qëndron në anën e Ukrainës.
“Jemi duke analizuar mënyra për t’i dhënë fund shpejt”, ka thënë Merz.
“I kam thënë presidentit se ai është personi kryesor botë që mund të bëjë këtë, duke i bërë presion Rusisë”.Gjermania është mbështetësja e dytë më e madhe për Ukrainën – pas Shteteve të Bashkuara – në aspektin ushtarak dhe financiar, teksa Kievi lufton pushtimin rus./ REL
