Maroku është shpallur zyrtarisht fitues i Kupës së Kombeve të Afrikës 2025, pasi CAF vendosi të përmbysë rezultatin e finales së humbur ndaj Senegalit dhe ta regjistrojë ndeshjen si fitore 3-0 në tavolinë për përfaqësuesen marokene. Vendimi u mor nga Bordi i Apelit i CAF pas ankimimit të Federatës Mbretërore Marokene të Futbollit.
Finalja e zhvilluar më 18 janar ishte fituar fillimisht nga Senegali me rezultatin 1-0 pas kohës shtesë, në një sfidë të shoqëruar me polemika të mëdha. Ndeshja u ndërpre pas refuzimit të lojtarëve senegalezë për të vijuar lojën, pasi Maroku fitoi një penallti në minutat shtesë me rezultatin ende 0-0. Pas një vonese, loja rifilloi, Brahim Diaz e humbi penalltinë, ndërsa Pape Gueye shënoi më pas golin e fitores për Senegalin në shtesë.
Megjithatë, CAF arriti në përfundimin se sjellja e Senegalit binte ndesh me nenet 82 dhe 84 të rregullores së turneut. Sipas organit qeverisës të futbollit afrikan, ekipi senegalez konsiderohet se ka humbur ndeshjen në tavolinë, ndërsa vendimi i mëparshëm i Bordit Disiplinor është rrëzuar.
Ky zhvillim i jashtëzakonshëm i jep Marokut trofeun kontinental pas një finaleje që pritet të mbetet gjatë në qendër të debatit në futbollin afrikan. Ndërkohë, Senegali humbet zyrtarisht titullin, pas një prej vendimeve më të forta të marra ndonjëherë nga CAF në një ndeshje finale.
