Vatra e zjarrit në Parkun Kombëtar të Lurës vijon të jetë aktive prej katër ditësh, ndërsa flakët kanë përfshirë një sipërfaqe prej rreth 300 hektarësh me pyje bredhi dhe kullota.
Situata paraqitet e vështirë për shkak të përhapjes së zjarrit në disa zona të parkut. Sipas informacioneve të deritanishme, flakët kanë përfshirë kurorën e Lurës, nga Borje-Lura, Livadhet e Stafës dhe Maja e Runjës, ndërsa zjarri po avancon edhe në drejtim të Lanë-Lurës.
Në terren janë angazhuar mbi 250 forca të Bashkisë, strukturat e emergjencave civile dhe shërbimet zjarrfikëse, së bashku me rreth 40 efektivë të Forcave të Armatosura, të cilët po punojnë për izolimin e vatrave.
Për tre ditë me radhë, në operacion janë përfshirë edhe dy avionë dhe dy helikopterë, por pavarësisht ndërhyrjes nga ajri, flakët ende nuk kanë mundur të izolohen dhe të shuhen plotësisht.
Zjarri vijon të përbëjë një kërcënim serioz për sipërfaqet pyjore të Parkut Kombëtar të Lurës, ndërsa forcat në terren po përpiqen të frenojnë përhapjen e mëtejshme të flakëve.
