Zjarret e paprecedenta që kanë përfshirë Francën këtë verë po shkaktojnë pasoja shkatërrimtare edhe për botën e egër. Ekspertët paralajmërojnë se mijëra kafshë kanë mbetur të bllokuara mes flakëve, ndërsa habitatet e tyre janë shkatërruar në një shkallë që do të ketë pasoja për vite me radhë. Sipas biologëve, është ende herët për të llogaritur numrin e kafshëve të ngordhura, por dëmet pritet të jenë katastrofike.
Drerët, iriqët, dhelprat, zvarranikët, zogjtë dhe shumë specie të tjera të vogla nuk kanë mundur t’u shpëtojnë flakëve, ndërsa specie të rrezikuara rrezikojnë të humbasin pjesë të konsiderueshme të popullatave të tyre. Organizatat për mbrojtjen e natyrës theksojnë se zjarret nuk shkatërrojnë vetëm kafshët, por edhe foletë, burimet ushqimore dhe zonat e shumimit, duke e bërë rikuperimin shumë të vështirë.
Vetëm këtë vit, mbi 116 mijë hektarë tokë janë djegur në Francë. Ministrja franceze për Tranzicionin Ekologjik, Monique Barbut, deklaroi se humbjet në faunë do të jenë “katastrofike”, duke veçuar se pyjet e prekura strehojnë një biodiversitet të pasur me zogj, gjitarë dhe specie të tjera të egra.
Shkencëtarët paralajmërojnë se valët e njëpasnjëshme të të nxehtit dhe thatësira, të lidhura me ndryshimet klimatike, po i bëjnë zjarret gjithnjë e më të shpeshta dhe më intensive në Evropë, duke kërcënuar jo vetëm njerëzit dhe pronat, por edhe ekosisteme të tëra natyrore.
