Reshjet e dendura të dëborës që kanë përfshirë juglindjen e Shqipërisë kanë krijuar një situatë të vështirë, duke shkaktuar bllokime të rrugëve dhe ndërprerje të furnizimit me energji elektrike në disa zona.
Në lartësitë mbi 800 metra, trashësia e dëborës ka arritur deri në 30 cm, duke sjellë probleme serioze për qarkullimin e mjeteve. Ndër zonat më të prekura është Korça, ku në aksin rrugor Boboshticë – Dardhë dëbora ka arritur trashësinë maksimale, veçanërisht në majën e Bigllës.
Autoritetet rrugore kanë reaguar shpejt për të mbajtur akset kryesore të hapura. Më shumë se 15 mjete borëpastruese janë angazhuar gjatë natës për të siguruar kalueshmërinë në rrugët Korçë – Dardhë, Korçë – Voskopojë, Kamenicë – Ersekë dhe Zëmblak – Dogana e Goricës së Madhe. Megjithatë, aksi nga Maja e Qafë Qarrit deri në hyrje të Ersekës mbetet i bllokuar nga dëbora, duke e bërë të nevojshme devijimin e trafikut në rrugën e vjetër, e cila është e kalueshme pa probleme.
Dëmet janë ndier edhe në rrjetin elektrik, ku disa fshatra të njësive administrative Vithkuq dhe Lekas në bashkinë e Korçës, si dhe Leskoviku në bashkinë e Kolonjës, kanë mbetur pa energji. Grupet e OSHEE-së janë në terren për të riparuar rrjetin dhe për të rikthyer furnizimin me energji në zonat e prekura.
