Bashkëshorja e kryebashkiakut të Tiranës Erion Veliaj, Ajola Xoxa, nuk ka qenë e pranishme në seancën që po zhvillohet sot në GJKKO.
Përmes avokatit, Xoxa ka paraqitur raportin mjekësor dhe ka kërkuar nga togat e zeza që seanca ndaj saj të shtyhet me 63 ditë, aq sa e përcakton raporti, për shkak të pamundësisë fizike.
“Më 29 qershor kam lindur me cezarian dhe s’mund të komunikoj lirshëm me avokatin”, tha thënë Xoxa.
Avokati Gurali Brahimllari ka deklaruar se Xoxa ështe në pamundësi për të ardhur në proces. Ndaj ka kërkuar shtyrjen e seancës së sotme dhe pezullimin e shqyrtimit gjyqësor me 63 ditë sipas raportit shëndetësor.
Avokati i Ajola Xoxës, Gurali Brahimllari ka deklaruar ndër të tjera në seancë: “Vullneti i znj. Xoxa është ai i shprehur në kërkesën drejtuar gjykatës. Ajo ka qenë në pamundësi për t’u njohur me përmbajtjen e tyre. Edhe më parë ka qenë me raport mjekësor, por ne kemi përgatitur dhe kemi punuar për kërkesat paraprake. E pandehura ka shprehur qëndrimin e saj, duke bërë të ditur faktin se më 29 qershor ka kryer lindje me operacion dhe nuk mund të komunikojë lirshëm dhe privatisht me mbrojtësit, ndaj nuk mund të realizohet një mbrojtje efektive. Kërkohet shtyrja e seancës deri në përfundimin e raportit të paaftësisë për punë. Sipas Kodit të Punës, kërkohet shtyrja e procesit deri në shuarjen e kësaj problematike. Ligji garanton 63 ditë leje pas lindjes. Sa më sipër, në këtë situatë faktike, duke qenë në pamundësi për të siguruar një mbrojtje efektive, kërkohet pezullimi i procesit, bazuar në të drejtën e çdo nëne”.
Ajola Xoxe përmes deklaratës ka thënë: “Kërkoj të jem personalisht e pranishme dhe nuk autorizoj mbrojtësit e mi të vijojnë mbrojtjen time pa praninë time”.
