Gjykata e Dhomës Penale në Tiranë, ka lënë në qeli 32-vjeçaren turke, Julide Yazici.
Prokurori Francesk Ganaj ka kërkuar “arrest në burg” sepse rezulton e kërkuar, ndërkohë edhe gjyqtari Kujtim Vraniçi ka pranuar ta lërë në burg.
E dyshuara, tha para gjykatës se “Është e persekutuar politike”, pasi sipas saj “ka protestuar kundër Erdogan dhe nëse kthehet, i rrezikohet jeta”.
E reja me profesion mësuese , dyshohet për dhënie ndihme logjistike për organizatë terroriste dhe pjesëmarrje në organizatë terroriste dhe është arrestuar për llogari të shtetit Turk si e kërkuar.
Yazici rezulton e dënuar me katër vjet burgim për këto vepra, ndërsa i kanë mbetur pa kryer edhe tre vjet 5 muaj e 22 ditë.
Ajo është arrestuar për qëllime ekstradimi dhe u arrestua në Rinas teksa po udhëtonte nga Franca për në Shqipëri. Nga verifikimet në pikën kufitare të Rinasit u konstatua se ishte në kërkim nga Interpol Ankaraja.
Një burim pranë Interpol Ankara i tregoi gazetares Hoxha se para shtatë vitesh e dyshuara ka qentë studente dhe ka marrë pjesë në protestat kundër qeverisë së presidentit Recep Tayyip Erdogan.
Për këtë ajo kishte marrë azil politik në Francë. Avokati i saj Artan Shllaku deklaroi po ashtu para seancës se do të kërkonte lirimin e menjëhershëm dhe mos ekstradimin e saj, pasi i rrezikohet jeta.
