Forcat ajrore izraelite raportohet se kanë eleminuar Izz al-Din Haddad, lider i Hamasit në Rripin e Gazës dhe komandant i brigadave Al-Qassam, me një sulm ajror në Gaza.
Këtë e deklaruan kryeministri Benjamin Netanyahu dhe ministri i Mbrojtjes Israel Katz në një deklaratë të përbashkët.
Sipas mediave palestineze, sulmi goditi një ndërtesë banimi në lagjen Rimal.
Një zyrtar i lartë i sigurisë izraelite, i cituar nga The Times of Israel, deklaroi se ka “shenja të para” që lideri i Hamasit mund të jetë vrarë në sulm.
Netanyahu dhe Katz thanë se kishin urdhëruar vrasjen e Haddadit, komandant i krahut ushtarak të grupit terrorist dhe “një nga arkitektët e masakrës së 7 tetorit”.
“Haddad ka qenë përgjegjës për vrasjen, rrëmbimin dhe plagosjen e mijëra civilëve izraelitë dhe ushtarëve të Forcave të Mbrojtjes së Izraelit (IDF).
Ai ka mbajtur civilët tanë peng në kushte brutale robërie, ka drejtuar operacione terroriste kundër forcave tona dhe ka refuzuar të zbatojë marrëveshjen e udhëhequr nga presidenti amerikan Trump për çarmatimin e Hamasit dhe demilitarizimin e Rripit të Gazës”, thuhet në deklaratë.
