Ish-i dashuri i shqiptares Aurorës Tila ka pranuar se ishte ai që e vrau 13-vjeçaren, duke e hedhur nga ballkoni i banesës më 25 tetor 2024.
Në procesin e apelit, 17-vjeçari, asokohe 15, i dënuar me 17 vite burg nga Gjykata për të Miturit, ka ndryshuar versionin e tij dhe ka pranuar përgjegjësinë për vdekjen e vajzës. Ai ka kërkuar falje për veprimin dhe për faktin se ka vonuar kaq gjatë për ta pranuar.
“Me rrëfimin e tij mbyllet një rreth. Shpresojmë që Gjykata të konfirmojë vendimin e shkallës së parë, që ka përcaktuar një dënim të drejtë”, tha avokati Emilio Malaspina, që përfaqëson nënën e Aurorës.
Seanca e radhës është shtyrë për më 10 shtator, kur pritet që pas diskutimeve të Prokurorisë së Përgjithshme dhe mbrojtjes të merret edhe vendimi.
I riu ka bërë deklarata spontane përmes lidhjes video nga burgu i të miturve në Catanzaro. Gjykata ka kërkuar ndërkohë një raport mbi sjelljen e tij në institucionin e vuajtjes së dënimit, pasi ndaj tij raportohet se janë bërë edhe denoncime për vepra të tjera.
Në sallën e gjyqit ishte e pranishme edhe nëna e viktimës, Morena Corbellini.
Si ndodhi ngjarja
Sipas hetimeve, 15-vjeçari e kishte shtyrë Aurorën nga ballkoni dhe më pas, kur vajza ishte kapur me duar në përpjekje për të shpëtuar, e kishte goditur me gjunjë për ta detyruar të binte.
Provat e mbledhura nga autoritetet, të cilat në vendimin e shkallës së parë u cilësuan si “të pakundërshtueshme”, përfshijnë dëshmitë e personave që panë skenën dhe dëgjuan britmat e 13-vjeçares.
Hetimet zbuluan gjithashtu se Aurora kishte tentuar të mbyllte lidhjen në javët para vdekjes së saj, por i riu kishte vazhduar ta ndiqte dhe ta shqetësonte.
Në një mesazh ai kishte shkruar: “Plani im i hakmarrjes fillon tani, të mërkurën më 9 tetor në orën 02:50”.
E frikësuar nga situata, Aurora kishte kërkuar këshilla edhe nga ChatGPT, duke pyetur: “Sipas teje, a duhet ta lë?”. Këto biseda, të përfshira në dosjen hetimore, sipas gjykatës ndihmuan në vërtetimin e akuzës për përndjekje.
Gjykata theksoi se vajza ishte treguar e sinqertë në bisedat me chatbot-in, ku kërkonte të kuptonte si duhej të sillej në një situatë që e përshkruante si të vështirë dhe mbytëse. Këto të dhëna përputheshin edhe me rrëfimet që ajo u kishte bërë shoqeve, familjarëve dhe edukatores së shërbimeve sociale.
Sipas vendimit të shkallës së parë, një ditë para ngjarjes i riu i kishte thënë një personi tjetër se kishte ndërmend të vriste Aurorën. Për këtë arsye, sipas akuzës, ai kishte marrë me vete edhe një kaçavidë, e cila më pas u sekuestrua.
Në mesazhet drejtuar vajzës për takimin e fundit ai shkruante: “Nesër hera e fundit, pastaj kurrë më” dhe “Të premtoj që pas daljes së së premtes nuk do të të kërkoj më kurrë”.
Ndërsa Aurora shpresonte se takimi do të qetësonte situatën mes tyre, hetuesit pretendojnë se i riu kishte vendosur më parë ta vriste. Një qëllim që ai nuk e kishte pranuar deri në seancën e apelit.
