Interi, nën drejtimin e Cristian Chivu, ka arritur një fitore të rëndësishme 1-0 ndaj Lecce-s në ndeshjen e rikuperimit të javës së 16-të të Serie A. Pas barazimit 2-2 ndaj Napolit, zikaltrit u rikthyen te fitorja në kampionat, të mbështetur nga tifozët në “San Siro”.
Ndeshja nisi me Interin që zbriti në fushë me dyshen sulmuese Thuram–Bonny. Në minutën e 6-të, Bonny pati një rast të mirë shënimi, por goditja e tij u ndal nga një pritje e shkëlqyer e portierit të Lecce-s, Falcone. Rreth minutës së 24-t, pati pretendime për penallti pas një kontakti të dyshimtë në zonë mes Danilo Veiga-s dhe Bonny-t, por pas kontrollit të VAR-it, penalltia nuk u akordua.
Gjatë pjesës së parë, Sottil krijoi një moment rreziku duke tentuar të surprizonte portierin Sommer, por pa sukses. Në pjesën e dytë, Falcone vazhdoi të ishte protagonist, duke i mohuar golin Barella-s me një ndërhyrje tjetër vendimtare. Në minutën e 72-të, edhe Sommer u detyrua të ndërhynte, duke ndalur një goditje të Siebert.
Goli i fitores erdhi në minutën e 78-të: goditja e Lautaro Martínez-it u prit nga Falcone, por Pio Esposito ishte në vendin e duhur dhe shënoi nga topi i kthyer, duke i dhënë Interit tri pikët. Pak minuta më vonë, Esposito u afrua edhe me golin e dytë, por pa mundur të konkretizojë.
Me këtë fitore, Interi shkon në 46 pikë, duke u shkëputur me +6 nga rivalët e qytetit dhe ndjekësit në renditje. Lecce, nga ana tjetër, mbetet me 17 pikë dhe në një pozicion të vështirë në Serie A. Kjo ndeshje përbën një hap të rëndësishëm për Interin në garën për objektivat e sezonit.
