Ilir Meta, i është drejtuar Gjykatës së Posaçme me një kërkesë zyrtare për të mos u mbajtur në kabinën e xhamit gjatë zhvillimit të seancave gjyqësore.
Përmes përfaqësuesit të tij ligjor Kujtim Cakrani, Meta kërkon që të qëndrojë pranë mbrojtësit në sallën e gjyqit, duke argumentuar se izolimi në “kafazin e xhamit” cenon të drejtat kushtetuese dhe standardet ndërkombëtare për një proces të rregullt ligjor.
Theksohet se kjo praktikë bie ndesh me Konventën Europiane për të Drejtat e Njeriut, konkretisht me nenin 3 dhe nenin 6, si dhe me nenet 30 dhe 31 të Kushtetutës së Shqipërisë, që lidhen me prezumimin e pafajësisë dhe të drejtën për mbrojtje efektive.
Ilir Meta u arrestua më 21 tetor 2024. Ai dhe ish-bashkëshortja e tij Monika Kryemadhi dyshohen se, duke bashkëpunuar mes tyre dhe me funksionarë të tjerë shtetërorë, në disa episode duke nisur nga 15 vite më parë kanë shfrytëzuar postet e tyre shtetërore dhe politike për të favorizuar kompani private, si dhe në veprimtari të tjera me lobime në SHBA dhe shitblerje banesash në këmbim të përfitimit të shumave të konsiderueshme parash, të cilat janë përpjekur t’i fshehin, duke mos i deklaruar në ILDKPI dhe KQZ.
