Falë ndërhyrjes së menjëhershme Policore dhe bluzave të bardha, është shmangur tragjedia që mund të ndodhte për një familje në Lezhë.
Sapo kanë marrë njoftimin se një i moshuar i cili po ruante bagëtitë e tij rrëzë Kalasë së Lezhës, ishte rrëzuar, blutë e qytetit dhe ekipi i urgjencës mjekësore i Spitalit Rajonal të Lezhës kanë mbërritur menjëherë në vendngjarje.
Me të mbërritur në kalanë e qytetit, Policia dhe bluzat e bardha kanë mundësuar transportimin e menjëhershëm të 71-vjeçarit drejt spitalit të qytetit.
Për shkak të lëndimeve të marra dhe nevojës për mjekim më të specializuar bëhet me dije se i moshuari është transportuar për në Spitalin e Traumës.
Njoftimi i Policisë:
Shërbimet e Policisë dhe ekipi i urgjencës mjekësore i Spitalit Rajonal të Lezhës i shkuan në ndihmë një të moshuari të dëmtuar në zonë malore.
Pas marrjes së njoftimit se një i moshuar ishte dëmtuar në një zonë malore, mbi Kalanë e Lezhës, shërbimet e Policisë së Lezhës, në bashkëpunim me ekipin e urgjencës mjekësore të Spitalit Rajonal të Lezhës, kanë reaguar menjëherë.
Shtetasi, i cili ishte duke ruajtur bagëtitë në mal, dyshohet se ishte rrëzuar dhe kishte pësuar dëmtime, duke e pasur të pamundur lëvizjen.
Me mbërritjen në vendngjarje, shërbimet e Policisë dhe ekipi i urgjencës mjekësore i Spitalit Rajonal të Lezhës bënë të mundur transportimin e tij në Spitalin Rajonal të Lezhës, për të marrë ndihmën e parë mjekësore.
Më pas, për shkak të gjendjes së tij shëndetësore dhe nevojës për trajtim më të specializuar, 71-vjeçari u transportua në Spitalin e Traumës, në Tiranë.
Policia e Lezhës mbetet e angazhuar maksimalisht në shërbim të qytetarëve dhe i fton ata që, për çdo problematikë apo situatë emergjente, të telefonojnë në numrin pa pagesë 112.
