Kryetari i PD-së, Sali Berisha, gjatë takimit të organizuar nga Departamenti i Infrastrukturës, deklaroi se po nis një diskutim të gjerë mbi programin e opozitës, me synim adresimin e problemeve madhore të vendit.
Berisha akuzoi qeverinë për korrupsion masiv dhe vjedhje të fondeve publike:
“Probleme të krijuara nga shkalla më e lartë e korrupsionit që mund të përfytyrohet, nga vjedhjet 100% të fondeve siç është djegësi i Tiranës, tek vjedhjet 90% të veprave të tjera publike.”
Ai theksoi se rritja e çmimeve dhe mungesa e rritjes së pagave e pensioneve ka çuar në varfëri gati gjysmën e shqiptarëve:
“49% e shqiptarëve janë në varfëri ose rrezik varfërie.”
Kreu i PD e cilësoi mandatin e kryeministrit Edi Rama si të paligjshëm:
“Ky mandat ka zero legjitimitet. Edi Rama me farsën elektorale nuk ka asnjë ditë legjitime në pushtet.”
Berisha akuzoi Ramën për përfshirje në afera korruptive dhe për pengimin e drejtësisë. “Reagimi i tij ishte mbyllja e dyerve hetimit dhe sistemit të drejtësisë. Njeriu që në një paranojë injorance humbet çdo legjitimitet.” – tha ai.
