Kanë hyrë zyrtarisht në fuqi ndryshimet e reja në Kodin Rrugor, të cilat parashikojnë masa më të ashpra për shkelësit e rregullave të qarkullimit, veçanërisht për drejtuesit e mjeteve që drejtojnë automjetin nën efektin e alkoolit.
Paketa ligjore, e miratuar në seancën parlamentare të 18 qershorit dhe e publikuar në Fletoren Zyrtare më 22 korrik, ka nisur tashmë të zbatohet nga Policia Rrugore.
Një nga ndryshimet më të rëndësishme lidhet me drejtuesit e mjeteve që përsërisin shkeljen për drejtim automjeti nën efektin e alkoolit.
Sipas dispozitave të reja, çdo shofer që kapet për herë të dytë duke drejtuar automjetin me një nivel alkooli në gjak mbi kufirin e lejuar prej 0.5 gramë për litër, pasi është ndëshkuar më parë për të njëjtën shkelje, do t’i hiqet përfundimisht leja e drejtimit.
Ligji parashikon se kjo masë është përfundimtare dhe nuk lejon rikthimin e patentës.
Personat që humbasin lejen e drejtimit në këto kushte nuk do të kenë të drejtë të riregjistrohen në autoshkollë apo të pajisen sërish me patentë.
