Kombet e Bashkuara njoftuan se 20 anëtarë të stafit të saj janë kapur nga rebelët Huthi në kryeqytetin e Jemenit, Sanaa, pas një sulmi të fundit ndaj zyrave të organizatës. Jean Alam, zëdhënësi i koordinatorit të përhershëm të OKB-së në Jemen, deklaroi se pesë anëtarë të stafit vendas dhe 15 anëtarë ndërkombëtarë po mbahen në kompleksin e OKB-së. Ai shtoi se 11 punonjës të tjerë vendas u liruan pas marrjes në pyetje dhe se OKB është në kontakt me Huthit për të zgjidhur situatën dhe për të rivendosur kontrollin mbi objektet e saj.
Ky incident ndodhi një ditë pas një sulmi të ngjashëm më 31 gusht, ku rebelët kishin bastisur zyrat e OKB-së dhe kishin arrestuar rreth dhjetë punonjës, të cilët sipas Huthëve ishin të dyshuar për spiunazh në favor të SHBA-së dhe Izraelit. Situata është bërë më alarmuese, duke pasur parasysh se në muajt e fundit janë arrestuar dhjetëra punonjës të OKB-së në zonat nën kontrollin rebel.
Udhëheqësi rebel, Abdelmalek al-Houthi, gjatë një fjalimi televiziv, tha se grupi i tij kishte zbulua dhe shkatërruar “një nga qelizat më të rrezikshme të spiunazhit”, që ishte e lidhur me organizata humanitare si Programi Botëror i Ushqimit dhe UNICEF. Megjithatë, Stephane Dujarric, zëdhënësi i sekretarit të përgjithshëm të OKB-së, i quajti akuzat e Huthëve si “të rrezikshme dhe të papranueshme”, duke e theksuar rrezikun që ato paraqesin për sigurinë e stafit të OKB-së dhe operacioneve humanitare.
Në mesin e këtij tensioni, koordinatori humanitar i OKB-së për Jemenin kishte kaluar nga Sanaa në Aden, selinë e përkohshme të qeverisë së njohur ndërkombëtarisht. Pas dhjetë vjet luftë civile, Jemen është në një krizë humanitare të thellë, duke u renditur si një nga vendet më të varfra të Gadishullit Arabik. OKB ka bërë thirrje për zgjidhje të shpejtë dhe të qëndrueshme për të parandaluar përkeqësimin e situatës.
