Kreu i Partisë Demokratike, Sali Berisha, ka vizituar në spital nënkryetarin e Parlamentit, Agron Gjekmarkaj, pas një incidenti të ndodhur gjatë protestës së opozitës.
Gjekmarkaj humbi ndjenjat dhe u transportua menjëherë në Spitalin e Traumës, ku ka marrë ndihmën e nevojshme mjekësore. Fotot tregojnë Gjekmarkajn të shtrirë në krevat, i rrethuar nga mjekë dhe Berisha, ndërsa një mjek po i mat tensionin, dhe një doktor tjetër i shpjegon Berishës gjendjen e deputetit të PD-së.
Sipas dëshmive të protestuesve, Gjekmarkaj ka humbur ndjenjat pas një përplasjeje me policinë, e cila ka ndodhur gjatë tentativës për të shpërndarë turmën. Raportohet se forcat e rendit e kanë rrethuar dhe shtrirë Gjekmarkajn në tokë, duke shkaktuar shqetësim mes deputetëve dhe protestuesve, të cilët janë mobilizuar menjëherë për t’i dhënë ndihmën e parë.
Para incidentit, Gjekmarkaj ka deklaruar se ishte dhunuar nga policia, e cila e kishte goditur me shkelma, edhe pse ai e kishte identifikuar veten si deputet.
