Një hetim i BBC ka zbuluar se një kompani private sigurie që mbikëqyr shpërndarjen e ndihmave humanitare në Gaza ka punësuar anëtarë të një bande motoristësh amerikane të njohur për qëndrimet e tyre anti-islame.
Sipas raportit, të paktën 10 anëtarë të “Infidels Motorcycle Club”, një grup i krijuar nga veteranë të luftës në Irak, janë angazhuar nga kompania UG Solutions (UGS) për të siguruar pikat e shpërndarjes së ushqimeve të Fondacionit Humanitar të Gazës (GHF).
Këto janë vendet ku, sipas Kombeve të Bashkuara, mbi 1,100 civilë – përfshirë gra dhe fëmijë – janë vrarë në muajt e fundit mes kaosit dhe të shtënave.
Hetimi tregon se shtatë prej anëtarëve të bandës mbajnë pozita drejtuese në këto qendra ndihme, përfshirë edhe drejtimin e ekipeve të armatosura. Kreu i tyre, Johnny “Taz” Mulford, ish-ushtar i ushtrisë amerikane i dënuar më parë për korrupsion dhe mashtrim, drejton operacionet e UGS në Gaza.
Infidels MC përdor simbolin e kryqëzatës dhe është akuzuar për gjuhë të urrejtjes ndaj myslimanëve, përfshirë organizimin e një “rost derri” gjatë Ramazanit. Në faqet e tyre në rrjetet sociale gjenden postime me përmbajtje islamofobe dhe nxitëse për dhunë.
Organizata amerikane për të drejtat civile të myslimanëve CAIR e ka cilësuar situatën si “absurde dhe të rrezikshme”, duke thënë se “vendosja e një bande anti-islame për të mbrojtur ndihmat në Gaza është njësoj si t’i jepje Ku Klux Klan-it drejtimin e ndihmave në Sudan”.
Kompania UG Solutions i ka mbrojtur punësimet e saj, duke thënë se çdo punonjës kalon kontrolle të plota të sigurisë dhe se nuk diskriminojnë për “hobi ose lidhje personale”.
Ndërkohë, Fondacioni Humanitar i Gazës ka deklaruar se ka politikë zero-tolerancë për urrejtjen dhe diskriminimin, duke shtuar se ekipi i saj është “i larmishëm dhe funksional”.
Sipas dokumenteve të siguruara nga BBC, kontraktorët e UGS paguhen mbi 900 dollarë në ditë, ndërsa drejtuesit e ekipeve marrin mbi 1,500 dollarë në ditë, duke e bërë këtë një punë shumë fitimprurëse për anëtarët e bandës.
Kombet e Bashkuara kanë theksuar se shumica e viktimave në këto pika ndihme janë shkaktuar nga forcat izraelite të sigurisë, ndërsa akuzat se kontraktorët privatë kanë qëlluar mbi civilët janë ende “nën shqyrtim”.
