Hamasi ka lëshuar një deklaratë tjetër në përgjigje të planeve të Izraelit për të pushtuar Gazën. Ajo (deklarata) thotë se është gati për një “marrëveshje gjithëpërfshirëse” për lirimin e pengjeve, në këmbim të një armëpushimi dhe tërheqjes së trupave izraelite.
Grupi e paralajmëron Izraelin se çdo pushtim i Qytetit të Gazës do të ketë një “çmim të lartë” – një mesazh që po e përsërit.
Bisedimet midis dy palëve – të ndërmjetësuara nga Egjipti dhe Katari – nuk kanë bërë ndonjë përparim thelbësor që nga fundi i korrikut, kur Izraeli dhe SHBA-të thanë se Hamasi tregoi një “mungesë dëshire” dhe ekipi amerikan u tërhoq.
Për Qytetin e Gazës, ku vlerësohet se jetojnë ende rreth një milion civilë, perspektivat janë të zymta. Qeveria izraelite do të përpiqet përsëri ta detyrojë të gjithë popullsinë të shpërngulet në jug, një proces që raportet sugjerojnë se mund të përfundojë brenda dy muajsh.
Nga ana izraelite, më parë zyra e kryeministrit ka përcaktuar “parimet e mëposhtme për përfundimin e luftës”, të cilat janë dakordësuar nga kabineti i sigurisë i Izraelit. Ato janë:
1. Çarmatimi i Hamasit
2. Kthimi i të gjithë pengjeve – të gjallë dhe të vdekur
3. Demilitarizimi i Rripit të Gazës
4. Kontrolli i sigurisë izraelite mbi Rripin e Gazës
5. Ekzistenca e një qeverie alternative civile që nuk është Hamasi ose Autoriteti Palestinez.
Pjesa më e madhe e botës po e shikon me tmerr luftëm, ndërsa izolimi diplomatik i Izraelit duket se do të thellohet. Pushtimi i Gazës nga Netanyahu mund të vërë në provë edhe durimin e aleatit të tij besnik në Shtëpinë e Bardhë.
“Çdo zgjerim i operacioneve ushtarake në të gjithë Rripin e Gazës do të rrezikonte pasoja katastrofike”, tha një zëdhënës i Zyrës së OKB-së për Koordinimin e Çështjeve Humanitare për BBC Radio 5 Live.
Olga Cherevko, e cila jeton në Deir Al Balah në Gaza, thotë se “E gjithë popullsia e Gazës është në prag të urisë dhe tashmë po përballon gati dy vjet luftë brutale.”
Sipas saj, edhe stafi i OKB-së është i prekur nga mungesa e ushqimit. “Kam kolegë në zyrën time që janë shtruar në spital nga një lodhje e rëndë sepse nuk po hanë. Kemi kolegë që u bie të fikët në zyrë sepse nuk mund të marrin ushqim.”
Cherevko përsërit thirrjen e OKB-së për lirimin e pengjeve dhe për një armëpushim.
