Trajneri i Spanjës, Luis de la Fuente, ka përfshirë disa emra të rinj dhe në formë shumë të mirë në listën paraprake të fundit para shpalljes së skuadrës për Botëror.
Tekniku spanjoll pritet të bëjë publike këtë të premte listën për ndeshjet miqësore të javës së ardhshme ndaj Serbisë në Villarreal dhe ndoshta edhe ndaj Egjiptit, gjithashtu në shtëpi. Dëmtimet e shumta kanë hapur derën për futbollistë që po kalojnë një moment shumë pozitiv dhe disa prej tyre mund të sigurojnë një vend në Botëror.
Në listën paraprake janë përfshirë Pubill i Atlético Madrid, Asensio i Fenerbahçes, Víctor Muñoz i Osasunës, Álex Jiménez i Bournemouth, Gonzalo i Real Madridit dhe Marc Bernal i Barcelonës.
Pjesa më e madhe e 26 lojtarëve që do të udhëtojnë në Botëror pritet të jenë ata që morën pjesë në fazën kualifikuese, por disa nga këta emra të rinj mund të fitojnë terren në momentin e fundit. Ata që konsiderohen me më shumë shanse janë Pubill, Bernal dhe Asensio.
Pubill shihet si një kandidat serioz, sidomos për shkak se Le Normand nuk është në formën e tij më të mirë, ndërsa gjithçka mbetet e hapur edhe në repartin e djathtë të mbrojtjes, ku ka ende pikëpyetje për Carvajal. Një avantazh i madh për lojtarin e Atlético-s është fakti se mund të luajë si qendërmbrojtës dhe si mbrojtës i djathtë. Në këtë repart pëlqehet shumë edhe Álex Jiménez, që konsiderohet një nga të rinjtë më interesantë për trajnerin. Në të djathtë, një vend duket i rezervuar për Pedro Porro, ndërsa në të majtë Cucurella dhe Grimaldo mbeten të paprekshëm.
Sa i përket Marco Asensios, ai është një lojtar që De la Fuente e vlerëson shumë. Futbollisti spanjoll ka rigjetur formën më të mirë në Turqi dhe vlerësohet si për cilësinë, ashtu edhe për eksperiencën. Për më tepër, ai mund të luajë si mesfushor ofensiv apo si sulmues i dytë, duke i dhënë trajnerit më shumë alternativa në repartin sulmues.
Situata në mesfushë është bërë edhe më delikate për shkak të problemeve fizike të Fabián Ruiz dhe Mikel Merino. Fabián po luan me një frakturë që po e pengon ndjeshëm, ndërsa Merino i është nënshtruar një operacioni në këmbë dhe po lufton me kohën për të qenë gati në grumbullimin e muajit maj.
Në këtë situatë, rriten mundësitë edhe për Marc Bernal, i cili është rikthyer pas një dëmtimi serioz dhe e ka bërë këtë në mënyrë mbresëlënëse. Ai shihet si një profil që mund të kombinohet shumë mirë me Pedri dhe Fermín, dy lojtarë të rëndësishëm në idetë e trajnerit.
Në sulm, dy emra po fitojnë vëmendje: Gonzalo dhe Víctor Muñoz. Lojtari i Real Madridit vlerësohet shumë për raportin gola për minuta dhe për faktin se është një sulmues zone, profil që mund të rezultojë vendimtar në një turne si Botërori. Nga ana tjetër, rasti i Víctor Muñoz lidhet edhe me problemet fizike të Nico Williams, i cili po vuan nga një dëmtim i zgjatur në ijë. Shpejtësia dhe loja e drejtpërdrejtë e Muñoz kanë rënë në sy dhe ai mund të jetë një nga surprizat e listës përfundimtare.
Ndërkohë, edhe porta mbetet një çështje ende e hapur, por nëse nuk ka dëmtime të reja, për Botërorin pritet të grumbullohen portierët që kanë qenë pjesë e fazës kualifikuese: Unai Simón, David Raya dhe Álex Remiro. Për momentin, Joan García duket se do të duhet të presë deri në shtator për një mundësi me kombëtaren.
