Guvernatori i Bankës së Shqipërisë, Gent Sejko, deklaroi se rritja e aksesit në kredi për ndërmarrjet e vogla dhe të mesme duhet të konsiderohet një prioritet kombëtar, pasi ky sektor mbetet shtylla kryesore e ekonomisë shqiptare.
Gjatë ceremonisë së nënshkrimit të Memorandumit të Mirëkuptimit në kuadër të “Nismës kombëtare për financimin e ndërmarrjeve mikro, të vogla dhe të mesme, si dhe të fermerëve”, Sejko tha se sistemi bankar shqiptar ka shënuar progres të dukshëm në kreditim gjatë viteve të fundit.
Sipas tij, portofoli i kredisë për sektorin privat ka arritur në 907 miliardë lekë në fund të marsit 2026, nga 575 miliardë lekë pesë vite më parë, ndërsa kredia për sektorin privat është rritur me mesatarisht 15% në vit gjatë dy viteve të fundit.
“Aktualisht, kredia bankare përbën një ndër flukset më të mëdha monetare në ekonomi dhe është instrumenti kryesor i financimit të bizneseve dhe familjeve shqiptare”, u shpreh Sejko.
Guvernatori theksoi se sistemi bankar është kthyer tashmë në një partner të besueshëm për sektorin privat, duke ofruar jo vetëm ruajtje të sigurt të kursimeve, por edhe instrumente moderne pagese dhe produkte të diversifikuara kredie.
Megjithatë, ai nënvizoi se ndërmarrjet e vogla dhe të mesme vijojnë të kenë akses më të kufizuar në financim krahasuar me bizneset e mëdha.
“Segmenti i ndërmarrjeve të vogla e të mesme, i cili përbën shtyllën kurrizore të ekonomisë shqiptare, ka një akses relativisht të ulët në kredi. Për këto arsye, rritja e kredisë për këtë segment duhet konsideruar si një prioritet i rëndësishëm kombëtar”, tha Sejko.
Sejko bëri të ditur se Banka e Shqipërisë ka vënë në zbatim prej më shumë se një viti një Program Financimi për Biznesin e Vogël dhe të Mesëm, i cili synon uljen e kostove të kredisë për këtë kategori biznesesh.
Ai përmendi gjithashtu edhe skemën e garancisë sovrane të miratuar nga qeveria për sektorin bujqësor, duke e cilësuar atë si një instrument të rëndësishëm për nxitjen e kreditimit.
“Dëshiroj t’i bëj thirrje industrisë bankare për të pasur një vëmendje më të madhe ndaj financimit të sektorit të SME-ve, e veçanërisht atij agro”, tha Sejko.
Në përfundim, Guvernatori i Bankës së Shqipërisë u bëri thirrje edhe vetë bizneseve të vogla dhe të mesme që t’u drejtohen bankave jo vetëm si burim financimi, por edhe si partnerë të besueshëm për zhvillimin e tyre afatgjatë.
