Iliria News pamjet e momentit kur kamerieri 18-vjeçar Genti Nela dhunohet nga djemtë e pronarit të hotelit “Flar” në Malin e Robit në Golem. Në pamje, fillimisht dallohet 18-vjeçari i veshur me një bluzë të zezë, i cili godet me grusht Arbër Habilajn, i shpallur në kërkim pas ngjarjes.
Dinamika e sherrit dhe e përplasjes para këtij momenti është ende e paqartë. Por menjëherë pasi 18-vjeçari ka goditur Habilajn, ky i fundit bashkë me 3 persona të tjerë e rrethojnë të riun duke e qëlluar me grushte pa pushim dhe duke e shtyrë. Dhuna zgjat të paktën 30 sekonda.
Sipas policisë, përplasja e dhunshme ka ndodhur pasi i riu ka kërkuar pagesën për punën në hotel. Për ngjarjen ka rënë në pranga Florian Habilaj, djali i pronarit të hotelit dhe Enold Dragoti, shoku i pronarit. Të dy akuzohen për vrasje me dashje e mbetur në tentativë dhe u lanë në qeli vetëm një ditë më parë nga Gjykata e Durrësit. Në gjendje të lirë po hetohet dhëndri i pronarit.
Ndërkohë, në burg ka përfunduar edhe xhaxhai i 18-vjeçarit, Melison Nela. Ky i fundit pasi u vu në dijeni për dhunën ndaj nipit, mori kallashnikovin dhe shkoi të vrasë autorët, por u ndalua nga policia. Ndaj tij rëndon akuza e armëmbajtjes pa leje.
