Një gomone ka shkelur perimetrin e sigurisë detare në zonën e Gjirit të Hartës, në Ksamil, duke lundruar brenda hapësirës së rezervuar për pushuesit dhe duke rrezikuar sigurinë e tyre.
Ngjarja u filmua nga qytetarë të pranishëm në plazh, të cilët e denoncuan menjëherë rastin pranë Policisë së Shtetit.
Pas marrjes së informacionit, shërbimet e Policisë Kufitare dhe Njësisë Policore Detare identifikuan drejtuesin e mjetit lundrues, bllokuan gomonen dhe vendosën masë administrative ndaj tij.
Drejtuesi u ndëshkua me gjobë në vlerën 500 mijë lekë të rinj për shkeljen e rregullave të sigurisë detare.
Policia Kufitare u bën thirrje drejtuesve të mjeteve lundruese që të respektojnë me rigorozitet perimetrat e sigurisë në zonat e plazheve dhe rregullat e lundrimit, duke paralajmëruar se çdo shkelje që cenon jetën dhe sigurinë e pushuesve do të ndëshkohet sipas ligjit.
Ndërkohë, kontrollet në zonat bregdetare vijojnë nga strukturat e Policisë Kufitare dhe Njësisë Policore Detare, me qëllim garantimin e sigurisë së pushuesve gjatë sezonit turistik.
