Barcelona ka publikuar raportin zyrtar mjekësor, duke i dhënë një goditje të rëndë stafit teknik dhe tifozëve në një moment delikat të sezonit.
Sulmuesi brazilian i katalanasve, Raphinha, do të mungojë për të paktën pesë javë pasi pësoi një dëmtim gjatë grumbullimit me kombëtaren e Brazilit. Sipas ekzaminimeve të kryera në bashkëpunim me Federatën Braziliane të Futbollit, lojtari ka pësuar një dëmtim muskulor në pjesën e pasme të kofshës së djathtë.
Dëmtimi erdhi në momentin më të keq, gjatë një ndeshjeje miqësore prestigjioze ndaj Francës në Boston, të enjten e kaluar. Raphinha ndjeu shqetësime që në pjesën e parë dhe u zëvendësua në pushim.
“Lojtari rikthehet në Barcelonë për të nisur menjëherë trajtimin e nevojshëm nën mbikëqyrjen e stafit mjekësor të klubit”, thuhet në deklaratën zyrtare të Barcelonës.
Kjo do të thotë se braziliani do të humbasë me siguri fazën vendimtare të sezonit, përfshirë edhe disa ndeshje shumë të rëndësishme në La Liga.
