Policia Kombëtare spanjolle ka goditur një organizatë kriminale me origjinë shqiptare, e cila dyshohet se merrej me trafikun e kokainës në Spanjë dhe vende të tjera të Evropës.
Operacioni ka çuar në arrestimin e 15 personave, mes tyre shtetas shqiptarë, ndërsa janë sekuestruar më shumë se 2.7 tonë kokainë.
Hetimet, të nisura në vitin 2025, kanë zbuluar se grupi kishte bazën kryesore në Costa del Sol, ndërsa përdorte Katalonjën si pikë magazinimi për ngarkesat e drogës përpara transportimit të tyre drejt vendeve të tjera evropiane.
Një nga goditjet kryesore të policisë ishte një vilë në Sant Just Desvern, pranë Barcelonës, ku u gjetën 1.351 kilogramë kokainë të fshehura në garazh. Sipas hetuesve, vila merrej me qira për periudha të shkurtra, në disa raste vetëm për një fundjavë, për të shmangur zbulimin nga autoritetet.
Grupi dyshohet se përdorte edhe makina luksoze dhe të fuqishme për transportin e drogës. Policia ka sekuestruar në total 29 automjete, ndërsa hetuesit kanë dokumentuar raste kur anëtarët e grupit kanë udhëtuar më shumë se 2 mijë kilometra brenda një dite, në kolona me disa makina.
Sipas policisë spanjolle, kokaina vinte nga Kolumbia dhe fillimisht kalonte përmes zonës së Campo de Gibraltar. Më pas, ngarkesat dërgoheshin në pika të ndryshme magazinimi në Spanjë dhe prej andej transportoheshin drejt vendeve të tjera të Evropës.
Gjatë operacionit janë sekuestruar gjithashtu rreth 800 gramë tusi, dy armë zjarri, para cash, bizhuteri, ora luksoze dhe kriptoaktive.
Kontrollet u zhvilluan në disa zona të Spanjës, përfshirë Málaga, Estepona, Marbella, Churriana, Alicante dhe Barcelona. Në total janë arrestuar 15 persona, ndërsa 12 prej tyre janë dërguar në paraburgim, sipas raportimeve të mediave spanjolle.
Autoritetet dyshojnë se grupi kishte një strukturë të organizuar dhe lidhje familjare mes disa prej anëtarëve. Hetuesit po vijojnë punën për identifikimin e personave të tjerë që mund të kenë qenë të përfshirë në trafikun dhe shpërndarjen e drogës.
