Kryetari i Bashkisë së Tiranës, Erion Veliaj, është paraqitur mëngjesin e sotëm në Gjykata Administrative, ku u zhvillua seanca e radhës lidhur me padinë e tij ndaj prokurorit Ols Dado.
Veliaj kërkon shfuqizimin e dekretit presidencial me të cilin Dado është emëruar prokuror në vitin 2008, duke pretenduar se në momentin e emërimit nuk ishin plotësuar kushtet ligjore për marrjen e statusit të magjistratit.
Gjatë seancës, Veliaj deklaroi se po krijohet një “asimetri” në procesin gjyqësor, duke pretenduar se njërës palë po i shtohen aktorë me interes publik, ndërsa palës tjetër po i kufizohen mundësitë. Ai u shpreh se për 540 ditë është privuar nga ushtrimi i detyrës dhe nga familja e tij nga një person që, sipas tij, nuk kishte tagrin ligjor për të ushtruar funksionin e prokurorit.
“Është evidente që po krijohet një asimetri. Njërës palë po i shtohen palët, ndërsa palës tjetër po i reduktohen. Njërës palë po i shtohen aktorë që kanë interes publik, ndërsa palës tjetër po i largohen.
Për 540 ditë, kryetari i Bashkisë është rrëmbyer nga detyra e tij dhe nga familja e tij, nga një njeri që ka veshur uniformën e shtetit, por që nuk e ka tagrin dhe më ka rrëmbyer nga detyra.
Pesha juaj, i nderuar gjyqtar, është të riktheni besimin e qytetarëve te drejtësia. Unë dy beteja i fitova në Gjykatën Kushtetuese pa shkuar ende në Strasburg.
Një noter që nuk ka kryer magjistraturën nuk mund të jetë prokuror. Ky nuk është më një vend qokash. Dikush nuk mund të veshë uniformën e dikujt tjetër dhe të ushtrojë një funksion të caktuar.
Kushdo palë që tregon interes kontribuon në këtë gjykim.”, ka thënë Veliaj.
