Sotme gjyqësore në Gjykatën Administrative ku palë të përfshira janë kryebashkiaku i Tiranës, Erion Veliaj, dhe prokurori i çështjes së tij, Ols Dado është shtyrë.
Bëhet me dije se Trupa gjykuese ka vendosur që shqyrtimi i çështjes të mos vijohet ditën e sotme, duke caktuar datën 3 korrik në orën 13:00 për seancën e re.
Veliaj kërkon shfuqizimin e dekretit të presidentit që e ka emëruar prokurorin në detyrë në vitin 2008.
Në seancë munguan përfaqësuesit e Këshillit të Lartë të Prokurorisë (KLP), gjë që u pasua me debate.
“Ne nuk kemi marrë një përgjigje nga ana e KLP-së. Ajo ka investuar më shumë në terr sesa në dritë. KLP nuk është mbledhur asnjëherë për ankesën tonë. Mendoj se është më mirë kështu, në mungesë të tyre”, është shprehur Veliaj.
“Kërkoi që gjykimi të vijojë në mungesë të KLP-së, pasi pretendimet e tyre janë dorëzuar”, ka shtuar avokati i Ols Dados.
“Seanca është publike. Çfarë kërkon një punonjës i Policisë së Shtetit në këtë sallë gjyqi? Çfarë kërkon kryesekretarja e gjykatës që vendos nëse lejohen apo jo kamerat? Mbyllja hermetike e një gjykate, duke iu referuar Kushtetutës, nuk është e pranueshme. Ky proces duhet të jetë para syve të publikut. Kjo është e papranueshme, i nderuar gjyqtar. Ekziston një udhëzim i KLGJ-së, të cilin ju po e përdorni si bazë ligjore“, ka argumentuar avokati i Veliajt, Plarent Ndreca. Sipas Ndrecës, KLP dhe prokurori Dado po veprojnë në mënyrë të paligjshme, duke e cilësuar dekretin e emërimit si një akt të pavlefshëm.
Në mes të kundërshtive, Veliaj ka gjetur një moment për të folur mbi gjendjen e Tiranës, që kur ai është futur në qeli.
“Janë bërë plehrat mullar, aq sa i shoh unë nga dritaret. S’është mbjellë një pemë, qyteti ka 500 ditë pa drejtim. Unë kam lënë aty projektet e shkollave, por askush nuk i merr përsipër”, ka theksuar ai.
