Gjon Shkambi, personi i akuzuar nga Prokuroria e Tiranës se ka nxitur nipin e tij Elvis Shkëmbi që të vriste gjyqtarin që kishte në dorë rastin e pronës së tyre, është rikthyer këtë të hënë në vendin e krimit.
Ai ka dalë para kolegëve të gjyqtarit të vrarë, në Gjykatën e Apelit, dhe ka kërkuar zbutjen e masës së sigurisë, por sërish është lënë në qeli. Gjoni ka bërë një dëshmi të fortë, kur është shprehur se për shkak të konflikteve me vëllezërit, ata i kishin vënë pas nipin.
“I shpreh ngushëllime familjes së gjyqtarit Kalaja dhe kolegëve të tij. Nuk kam patur dijeni që nipi im të ketë patur armë, ta dija do e kisha parandaluar. Unë kam konflikte me vëllezërit e mi ndaj ma kanë vënë pas nëpër gjyqe nipin tim Elvisin pasi dyshonin se t’u bëja dredhira.
Nuk kam pasur ndërmend ti zgjidhja me dhunë këto gjëra pasi kam 30 vjet që kam zgjedhur rrugën gjyqësore. Nëse do kisha zgjedhur dhunën, do e kisha bërë më përpara”, ka deklaruar Gjon Shkambi para trupës së Gjykatës së Apelit Tiranës.
Nuk dihet nëse kjo është një deklaratë me të cilën ai akuzuari kërkon të zbusë rolin e tij në raport me krimin që tronditi themelet e Republikës, apo në të vërtetë vëllezërit Shkambi e kanë humbur besimin të njëri-tjetri gjatë 15 viteve të përballjes me drejtësinë.
Gjyqtari Astrit Kalaja, u qëllua për vdekje me armë zjarri në sallën e gjyqit, pasditen e 7 Tetorit 2025 sapo dha një vendim në emër të Republikës.
Palë në proces ishin Gjon Shkambi dhe Elvis Shkambi, të cilët kërkojnë lirimin e ambienteve të një prone që ata kanë në Shkodër, nga rreth 16 familje që e kanë zënë atë më shumë se 20 vite më parë dhe nuk pranojnë të dalin prej andej.
Menjëherë pas shpalljes së vendimit nga gjyqtari Astrit Kalaja, shtetasi Elvis Shkambi, i cili ndodhej në sallë, nxori nga brezi një armë zjarri pistoletë dhe ka qëlluar disa herë në drejtim të gjyqtarit i cili si pasojë e të shtënave është rrëzuar në tokë.
Pas këtij veprimi, 30-vjeçari i ka drejtuar pistoletën shtetasve Rakip Kurtaj dhe Ervis Kurtaj, të cilët tentuan të dalin nga salla dhe qëlloi me armë zjarri (pistoletë) në drejtim të tyre. Menjëherë më pas, autori i dyshuar i ka lënë në dorë pistoletën punonjësit të sigurisë së gjykatës dhe pasi ka dalë në oborr, është kapur në flagrancë nga shërbimet e Komisariatit të Policisë Nr.1, Tiranë.
Gjyqtari u transportua me ambulancë në Spitalin e Traumës Tiranë, por gjatë rrugës ndërroi jetë, ndërsa dy të dëmtuarit e tjerë pas marrjes së ndihmës së specializuar mjekësore, ndodhen jashtë rrezikut për jetën.
