Kombëtarja e Gjermanisë ka siguruar kualifikimin nga faza e grupeve në Kupën e Botës 2026, duke i dhënë fund një serie zhgënjimesh që e kishte shoqëruar në dy edicionet e fundit të turneut.
Pas eliminimeve të papritura që në fazën e grupeve në Botërorin e Rusisë 2018 dhe atë të Katarit 2022, “Panzerat” më në fund janë rikthyer në fazën me eliminim direkt. Fitorja 2-1 ndaj Bregut të Fildishtë u siguroi gjermanëve një vend në raundin e 32 skuadrave më të mira të turneut.
Ky është kualifikimi i parë i Gjermanisë nga faza e grupeve të një Kampionati Botëror që prej vitit 2014. Pikërisht në Botërorin e Brazilit, gjermanët zhvilluan një nga fushatat më të suksesshme në historinë e tyre, duke fituar trofeun e katërt të Kupës së Botës pas triumfit ndaj Argjentinës në finale.
Pas dy dështimeve radhazi në vitet 2018 dhe 2022, rikthimi në fazën me eliminim direkt konsiderohet një hap i rëndësishëm për kombëtaren gjermane në përpjekjen për t’u rikthyer mes pretendentëve kryesorë për titullin botëror.
