Sekretari i SHBA-së, Marco Rubio, mbërriti në Izrael të enjten si pjesë e përpjekjeve për të stabilizuar situatën në Gaza pas shpalljes së armëpushimit. Në një fjalim dhe gjatë vizitave në Izraelin jugor, ai theksoi rëndësinë e koordinimit të armëpushimit si një “mision historik”. Rubio nënvizoi se Shtetet e Bashkuara dhe partnerët e tyre po punojnë aktivisht për të ruajtur armëpushimin, për të ofruar ndihmë humanitare dhe për të përgatitur forcën ndërkombëtare të stabilizimit për të hyrë në Rripin e Gazës.
Ai e përshkroi procesin e zbatimit të planit të armëpushimit si një rrugë me sfida të shumta, duke pranuar se do të ketë “ulje-ngritje dhe trazira”. Megjithatë, Rubio shprehu optimizëm për progresin e arritur deri më tani. “Ky është një mision historik. Zbatimi i planit nuk do të jetë një proces linear,” tha ai, duke theksuar nevojën e vazhdueshme për përkushtim dhe mbështetje.
Një aspekt i rëndësishëm i fjalimit të tij ishte pohimi se Izraeli është në të drejtën e tij për të vepruar dhe nuk ka nevojë për lejen e SHBA-së për të rifilluar operacionet ushtarake nëse Hamasi paraqet një kërcënim. “Nuk ka plan B,” tha Rubio, duke theksuar se armëpushimi aktual është më i miri dhe i vetmi që mund të funksionojë. Ai gjithashtu theksoi rëndësinë çarmatosjes së Hamasit dhe konfirmoi se çdo refuzim për të hequr armët do të konsiderohej një shkelje e marrëveshjes dhe do të kishte pasoja.
Me këtë vizitë, Uashingtoni nënvizon angazhimin e tij për të mbështetur një zgjidhje afatgjatë në Gaza, duke u përqëndruar në stabilizimin e rajonit dhe mbështetje humanitare, por gjithashtu duke u përgatitur për scenarë të tjerë në rast se Hamasi nuk respekton armëpushimin. Kjo vizitë, e cila reflekton interesin e SHBA-së për ruajtjen e paqes në Lindjen e Mesme, vjen në një kohë të tensioneve të larta dhe pasigurie në rajon.
