Një deklaratë e fortë u bë nga gazetari Elton Qyno në podcastin “MaShqip me Flamur Vezaj”, ku u fol për zhdukjen e Ervis Martinajt dhe ngritjen e Ergys Agasit në nivelet e larta të pushtetit.
Sipas Qynos, Agasi u kishte treguar policisë dhe institucioneve të tjera fotografi që provonin se Martinaj ishte vrarë. Gazetari pretendon se informacioni mund të ketë mbërritur edhe te kryeministri Edi Rama dhe se pikërisht kjo i dha Agasit besim në nivelet më të larta.
“Me foto u tregoi institucioneve se Ervis Martinaj është vrarë dhe për këtë mori gjithë besimin e Ramës. Por mund t’ia ketë dërguar edhe Vlora Hysenit”,- deklaroi Qyno në podcast.
Gazetari e vendos këtë zhvillim pas zhdukjes së Martinajt në gusht të vitit 2022, periudhë pas së cilës, sipas tij, Agasi fitoi një rol më të rëndësishëm dhe nisi të kishte më shumë peshë në marrëdhëniet me institucionet.
Edhe gazetari Artan Hoxha, i ftuar në të njëjtin podcast, e lidhi fuqizimin e Agasit me periudhën pas zhdukjes së Martinajt. Hoxha tha se Agasi ishte shfaqur më herët në skenë, ndërsa pas vitit 2022, sipas tij, mori një tjetër rol.
Hoxha deklaroi gjithashtu se është i bindur se Ervis Martinaj është vrarë dhe se trupi i tij është zhdukur. Sipas tij, ai ka folur publikisht për këtë version vetëm pasi ishte bindur se zhdukja nuk ishte një inskenim.
Deklaratat e dy gazetarëve rikthejnë në vëmendje edhe një pretendim të bërë më herët për ekzistencën e materialeve që lidhen me fatin e Martinajt. Pyetja që ngrihet është nëse fotografitë e përmendura nga Qyno kanë ekzistuar dhe nëse u janë dorëzuar institucioneve, çfarë ndodhi më pas me këto materiale.
