Guvernatorët republikanë të disa shteteve amerikane, përfshirë Texas dhe Virginia, kanë aktivizuar Gardën Kombëtare për të përgatitur këto shtete ndaj protestave mbarëkombëtare që pritet të zhvillohen si reagim ndaj politikave të Donald Trump. Organizatorët e këtyre protestave, të njohura si “No Kings”, kanë njoftuar se do të zhvillohen në mbi 2,500 vende në të gjithë Shtetet e Bashkuara. Protestuesit akuzohen nga aleatët e Trump si të lidhur me lëvizjen Antifa, që është e njohur për qëndrimet e saj ekstreme ndaj qeverisë.
Protestat e fundit “No Kings” ishin shumë të suksesshme, duke grumbulluar më shumë se pesë milionë njerëz në qershor për të protestuar ndaj agjendës politike të Trump. Protestat e reja pritet të nisin në New York City dhe të përhapen në qytete të tjera, me qëllimin për të sfiduar autoritarizmin që ata mendojnë se po imponon Trump.
Në faqen zyrtare të lëvizjes, organizatorët deklarojnë se presidenti mendon se sundimi i tij është absolut, por ata theksojnë se në Amerikë nuk ka mbretër dhe se nuk do të tërhiqen përballë “kaosit, korrupsionit dhe mizorisë”. Ndërkohë, protesta solidariteti po zhvillohen edhe në Evropë, në qytete si Berlin, Madrid dhe Romë, duke e shprehur mbështetje për protestuesit amerikanë.
Trump, në një intervistë për Fox News, shprehu reagimin e tij ndaj protestave duke thënë: “Ata po më quajnë mbret. Por unë nuk jam mbret”. Guvernatori i Texas, Greg Abbott, e justifikoi aktivizimin e Gardës Kombëtare përpara një proteste të madhe në Austin me arsyetimin e kërcënimit të mundshëm nga Antifa. Në këtë veprim ai u kritikua ashpër nga demokratët, ku ligjvënësi Gene Wu tha se dërgimi i ushtarëve të armatosur për të shtypur protestat paqësore është veprim tipik i mbretërve dhe diktatorëve.
Edhe guvernatori i Virxhinias, Glenn Youngkin, urdhëroi aktivizimin e Gardës Kombëtare në shtetin e tij. Protestat “No Kings” pritet të përfshijnë figurat të njohura të artit, si Jane Fonda, Kerry Washington dhe John Legend.
