Nga 57 mjekë të qendrave shëndetësore të fshatrave të bashkisë Korçë, Maliq e Pustecit, 14 prej tyre janë mjekë pensionistë. Kjo pasi mjekët e rinj nuk pranojnë të shkojnë të punojnë në zonat rurale.
Një gjë e tillë pranohet edhe nga drejtori i Drejtorisë së Shëndetit Publik në Korçë, i cili shprehet se shteti detyrohet të zgjate kontratën me mjekët pensionistë pasi të rinjtë nuk pranojnë të punojnë në zonat rurale
“Nga 57 mjekë që janë aktiv e punojnë në qendrat shëndetësore, 14 prej tyre janë mjekë pensionistë. E para është mungesa e mjekëve të rinj në zonat rurale, preferojnë zonat urbane apo kryeqytetin. Një pjesë e tyre vijojnë specializimet, e kjo krijon vakume në mbulimin e kujdesit shëndetësor.
Në dukje është negative por për njerëzit është pozitive. Deri në këto momente kemi bërë maksimumin për kujdesin shëndetësor edhe në zonat më të larta”, thotë Mikel Llogori, drejtues i Drejtorisë së Shëndetit Publik në Korçë.
Petrit Kacorri prej 45 vitesh punon si mjek në qendrën shëndetësore në Maliq. Prej 4 vitesh ai ka dalë në pension. Por për të vijuar punën, mjeku i moshuar duhet të kalojë disa burokraci.
“Arrita 71 vjeç, që në 1980 kam filluar punë. Kam punuar mjek familje. Kam 4 vite në pension. Mos bëjë kontratat 6 mujore, mua më ka mbaruar kontrata ka një muaj, duhet të iki Tiranë për të shtyrë kontratën. Kjo është për të gjithë. Si unë janë 15-20 doktorë. Sa të jenë të shëndoshë të punosh, kur s’je i aftë ikën vetë”, shprehet Petrit Kacorri, mjek.
Të shumtë janë e mjekët që janë në prag pensioni, ndërsa largimi i mjekëve dhe infermierëve të rinj drejt Gjermanisë apo vendeve të Bashkimit Europian mbetet një plagë për shoqërinë shqiptare.
