Qeveria franceze ka njoftuar një masë të re drastike kundër duhanpirjes, që do të hyjë në fuqi më 1 korrik 2025.
Sipas njoftimit zyrtar, pirja e duhanit do të ndalohet në të gjitha hapësirat publike të hapura ku mund të jenë të pranishëm fëmijët. Kjo përfshin plazhet, parqet, kopshtet publike, zonat pranë shkollave, stacionet e autobusëve dhe objektet sportive.
“Ku ka fëmijë, pirja e duhanit duhet të zhduket”, deklaroi Ministrja e Shëndetësisë dhe Familjes, Catherine Vautrin, në një intervistë për gazetën Ouest-France. Ajo theksoi se masa ka për qëllim mbrojtjen e të drejtës së fëmijëve për të marrë ajër të pastër dhe theksoi se “liria për të pirë duhan mbaron aty ku fillon kjo e drejtë”.
Mosrespektimi i ndalimit do të ndëshkohet me një gjobë prej 135 eurosh. Masa do të aplikohet jo vetëm në ambientet pranë shkollave fillore, por edhe në ato pranë shkollave të mesme dhe universiteteve, me qëllimin për të penguar të rinjtë që të pinë duhan para hyrjes në institucionet arsimore.
Megjithatë, ndalimi nuk do të zbatohet për zonat e jashtme të kafeneve, si dhe nuk përfshin përdorimin e cigareve elektronike. Ministrja Vautrin ka paralajmëruar gjithashtu masa shtesë për të kufizuar përdorimin e cigareve elektronike, përmes uljes së përmbajtjes së nikotinës dhe reduktimit të numrit të aromave të lejuara.
Kjo nismë është pjesë e Programit Kombëtar për Luftën kundër Duhanpirjes 2023–2027, i cili është prezantuar fillimisht nga ish-ministri i Shëndetësisë Aurelien Rousseau. Qëllimi afatgjatë i programit është krijimi i një “brezi pa duhan” pas vitit 2032.
Sipas të dhënave zyrtare, pirja e duhanit shkakton rreth 75,000 vdekje në vit në Francë. Një sondazh i realizuar nga shoqata Ligue contre le cancer tregon se 62% e francezëve janë në favor të ndalimit të zgjeruar të duhanpirjes në hapësirat publike.
