Franca nuk ka arritur të fitojë apelimin për kartonin e verdhë të Michael Olise, të marrë në fitoren 1-0 ndaj Paraguajit në fazën e 1/16-ave të Kupës së Botës.
Anësori i Bayern Munich u ndëshkua në minutat shtesë pas një përplasjeje me Matias Galarza, në një ndeshje të tensionuar në Philadelphia. Franca kërkoi që kartoni të hiqej, por FIFA ka vendosur ta lërë në fuqi.
“Kartoni i verdhë nuk ka ndryshuar. FIFA na njoftoi këtë mëngjes se vendimi është mbajtur”, deklaroi Didier Deschamps para çerekfinales ndaj Marokut.
Situata e Olise është delikate, pasi ai rrezikon të mungojë në gjysmëfinale nëse Franca kualifikohet ndaj Marokut dhe lojtari merr një tjetër karton të verdhë. Deri tani, Olise ka qenë një nga lojtarët më të rëndësishëm për francezët në këtë Botëror, me pesë asistime.
Vendimi ka shkaktuar diskutime, sidomos pas rastit të Folarin Balogun, kartoni i kuq i të cilit u pezullua nga FIFA, duke e lejuar sulmuesin e SHBA-së të luante ndaj Belgjikës.
Nga ana tjetër, edhe Maroku ka një mungesë të rëndësishme për sfidën ndaj Francës. Ismael Saibari nuk do të jetë i gatshëm për çerekfinalen, për shkak të një dëmtimi muskulor të pësuar në fitoren 3-0 ndaj Kanadasë.
Saibari ka qenë një nga lojtarët kryesorë të Marokut në këtë turne, duke shënuar në të tre ndeshjet e grupit dhe duke realizuar edhe penalltinë vendimtare ndaj Holandës në fazën e 1/16-ave.
“Ai nuk është gati, por shpresoj të mos jetë fundi i turneut për të”, u shpreh trajneri i Marokut, Mohamed Ouahbi.
Franca dhe Maroku do të përballen për një vend në gjysmëfinalet e Kupës së Botës, në një sfidë ku të dyja skuadrat hyjnë me presion të madh dhe mungesa të rëndësishme.
