Këngëtari dhe kompozitori Flori Mumajesi pritet të rikthehet në skenën muzikore me një album të ri gjatë muajve shtator ose tetor, duke shënuar një nga rikthimet më të përfolura të vitit.
Lajmi është bërë i ditur nga gazetari Elton Tozaj në emisionin “Ora 7”, i cili tha se projekti muzikor është në përgatitje prej më shumë se një viti dhe përfshin si këngë të reja, ashtu edhe ripunime të disa prej hiteve të mëparshme të artistit. Sipas tij, në album do të përfshihen edhe versione të reja të këngëve të njohura si “Hëna” me Ylli Limanin dhe “Jeta” me Elvana Gjatën, duke i dhënë projektit një karakter miks mes nostalgjisë dhe risisë. Ajo që ka ngjallur më shumë interes është mundësia e një bashkëpunimi të ri mes Florit dhe Elvanës, një dyshe që ka sjellë disa nga hitet më të suksesshme të muzikës shqiptare.
“Është diskutuar prej kohësh dhe po, do të ketë një rikthim me Elvana Gjatën. Rikthim muzikor,” u shpreh Tozaj, duke shtuar se rikthimi i Mumajesit mund të jetë një nga më të mëdhenjtë e karrierës së tij.
