Ekipi i Flamurtarit është shpallur kampion i Shqipërisë në basketboll për femra për sezonin sportiv 2024-2025. Vlonjatet fituan sot 63-53 ndaj Tiranës në finalen e tretë play off, luajtur në Vlorë.
Flamurtari i fitoi të trija finalet e luajtura, duke triumfuar 3-0 me ndeshje ndaj bardhebluve. Edhe pse pritej një përballje më e fortë mes dy skuadrave më të mira në Shqipëri, këto finale konfirmuan dominimin e vlonjateve.
Një titull kampion i merituar për Flamurtarin, që e rriti nivelin e lojës së tij ndjeshëm muajt e fundit, duke triumfuar edhe në Ligën Unike. Ndërkohë që sot, bregdetaret ngritën lart edhe titullin e kampionatit.
Ndeshja e luajtur sot në Vlorë u dominua nga vendaset, që u shkëputën 20-7 që në periodën e parë, epërsi që e ruajtën deri në fund. Përpjekjet e bardhebluve ishin të vakta, pa forcën e duhur për të përmbysur shifrat.
Ramos me 16 pikë ishte shënuesja më e mirë e skuadrës vlonjate, mbështetur nga Thomas me 13 pikë e Johnson me 12. Për Tiranën u dallua Ndogbwo me 24 pikë, por që s’mjaftuan për të fituar.
Finale-Femra
Nd.1, Flamurtari – Tirana, 68-53
Nd.2, Tirana – Flamurtari, 69-78
Sot, Flamurtari – Tirana, 63-53 (3-0)
