Kolonët izraelitë e kanë rrahur njërin prej bashkëregjisorëve të filmit dokumentar “No Other Land” – i cili fitoi çmimin Oscar – të hënën në Bregun Perëndimor, para se ushtria izraelite ta arrestonte, sipas dy miqve të tij regjisorë dhe dëshmitarëve të tjerë.
Filmbërësi Hamdan Ballal ishte në mesin e tre palestinezëve që u arrestuan në fshatin Susia, sipas avokates së tyre, Lea Tsemel.
Policia i tha asaj se ata po mbaheshin në një bazë ushtarake për tretman mjekësor, por Tsemel theksoi të martën në mëngjes se nuk ka qenë në gjendje t’i kontaktojë ata dhe nuk ka informata për vendndodhjen e tyre.
Regjisori tjetër, Basel Adra ishte dëshmitar i arrestimit të Ballalit. Ai th se rreth dhjetëra kolonë – disa me maska, disa të armatosur dhe disa me uniformë izraelite – e sulmuan fshatin. Ushtarët që mbërritën drejtuan armët e tyre ndaj palestinezëve, ndërsa kolonët vazhduan të hidhnin gurë.
“Kemi ardhur nga Oscars dhe çdo ditë që prej atëherë ka pasur sulme ndaj nesh”, tha Adra për Associated Press.
“Kjo mund të jetë hakmarrja e tyre ndaj nesh për realizimin e filmit. Duket si ndëshkim”, shtoi ai.
