PSG mori një goditje të dyfishtë në ndeshjen ndaj Bayern Munich, e cila përfundoi me humbjen 1-2 për kampionët francezë. Përveç rezultatit, skuadra e Luis Enrique humbi edhe Ousmane Dembelén, fituesin e “Topit të Artë”, i cili pësoi një dëmtim muskulor në pulpë dhe pritet të mungojë deri në një muaj, sipas L’Équipe.
Trajneri Enrique tha pas ndeshjes se “duhet të pritet deri nesër për të pasur një vlerësim të saktë”, duke sqaruar se dëmtimi nuk lidhet me problemet e mëparshme të francezit. Dembélé u detyrua të linte fushën në minutën e 25-të, ndërsa më vonë doli se edhe mbrojtësi Achraf Hakimi ka pësuar një dëmtim serioz, me kohën e rikuperimit ende të paqartë.
Kjo është humbja e parë e PSG-së në fazën e grupeve të Champions League këtë sezon, dhe një alarm serioz për Luis Enrique, që tani përballet me mungesa të rëndësishme në një moment kyç të garës.
