Federata Shqiptare e Futbollit është ndëshkuar nga FIFA me një gjobë prej 20 mijë frangash zvicerane, pas sjelljes diskriminuese të disa tifozëve gjatë ndeshjes së Shqipërisë ndaj Andorrës. Komisioni Disiplinor i FIFA-s e ka konsideruar këtë sjellje si të papranueshme dhe ka vendosur gjithashtu mbylljen e 20% të kapacitetit të stadiumit në ndeshjen e radhës që Shqipëria do të luajë në kuadër të një kompeticioni të FIFA-s.
Ky dënim do të prekë kryesisht tribunat pas porte, ndërsa FIFA jep mundësinë që hapësirat e mbyllura të mbushen me grupe komunitare apo organizata që punojnë kundër diskriminimit, me miratimin paraprak të vetë institucionit ndërkombëtar të futbollit.
Po ashtu, brenda një afati gjashtëmujor, FSHF duhet të paraqesë një plan konkret për përmirësimin e masave kundër diskriminimit, i cili duhet të miratohet nga FIFA.
Në reagimin e saj zyrtar, Federata u bën thirrje tifozëve kuqezi që të vijojnë ta mbështesin Kombëtaren me pasion, por gjithmonë brenda kornizës së respektit dhe qytetarisë, duke shmangur çdo sjellje që mund të dëmtojë imazhin e ekipit dhe të pengojë rrugëtimin e tij ndërkombëtar.
