FIFA ka njoftuar shumën që do të shpërndajë për klubet që lëshojnë lojtarët e tyre për Kupën e Botës, duke vendosur një rekord të ri financiar.
Në total, do të shpërndahen 305 milionë euro përmes sistemit të kompensimit të klubeve, një rritje prej 70% krahasuar me Botërorin e Katarit. Për herë të parë, përfitime do të marrin edhe klubet që kanë lëshuar lojtarë gjatë fazës kualifikuese.
Pjesa më e madhe e shumës, rreth 215 milionë euro, do të shkojë për klubet që kanë futbollistë në fazën finale të Botërorit, i cili nis më 11 qershor. Pagesat do të llogariten në bazë të numrit të lojtarëve dhe ditëve që ata qëndrojnë në turne.
Shuma minimale për çdo lojtar do të jetë 4,200 euro në ditë, por ajo mund të rritet në varësi të ecurisë së kombëtareve dhe minutave të aktivizimit.
Manchester City, që ka numrin më të madh të lojtarëve të grumbulluar, mund të përfitojë deri në 190 mijë euro në ditë nëse të gjithë futbollistët e tij vazhdojnë të jenë në garë. Në total, klubi anglez mund të arkëtojë rreth 6 milionë euro nga ky sistem.
Rreth 80 milionë euro të tjera do të shpërndahen për fazën kualifikuese, me kompensim për çdo lojtar dhe çdo ndeshje të luajtur. Sipas përllogaritjeve, kjo shumë do të jetë rreth 2 mijë euro për lojtar për ndeshje.
Presidenti i FIFA-s, Gianni Infantino, e cilësoi këtë si një tjetër përfitim nga zgjerimi i Kupës së Botës, duke theksuar se më shumë klube do të mbështeten financiarisht për kontributin e tyre në turne.
Edhe presidenti i EFC, Nasser Al-Khelaïfi, vlerësoi faktin që për herë të parë ndihma financiare do të përfshijë edhe ndeshjet kualifikuese.
