Kanadaja ka siguruar kualifikimin në fazën e 1/8-ave të Kupës së Botës 2026, pas fitores së vështirë 1-0 ndaj Afrikës së Jugut në ndeshjen hapëse të fazës së 1/16-ave.
Ndeshja nuk dhuroi shumë spektakël dhe u vendos vetëm në minutat shtesë. Stephen Eustaquio shënoi golin vendimtar në minutën e 92-të, duke i dhënë vendit organizator një fitore shumë të rëndësishme dhe duke shmangur kohën shtesë.
Kanadaja ishte më e rrezikshme gjatë ndeshjes, edhe pse Afrika e Jugut mbajti më shumë topin. Skuadra afrikane regjistroi 58.2% zotërim, por nuk arriti të krijonte raste të pastra dhe në pjesën e parë nuk pati asnjë goditje në kuadrat.
Nga ana tjetër, Kanadaja u përpoq të rrezikonte sidomos nga goditjet standarde. Cornelius pati një mundësi të mirë para pushimit për hidratim, ndërsa pak para fundit të pjesës së parë Buchanan u ndal nga portieri Williams dhe Modiba.
Afrika e Jugut dha sinjalin e parë të rrezikut pas rreth një ore lojë me Apollis, por goditja e tij përfundoi ngushtë jashtë. Më pas, Williams mbajti në lojë skuadrën e tij me një pritje të rëndësishme ndaj Oluwaseyi në një duel direkt.
Futja në lojë e Alphonso Davies dhe Promise David i dha më shumë energji Kanadasë në minutat e fundit. Megjithatë, goli erdhi vetëm në shtesë, kur Eustaquio goditi ulët me të djathtën dhe dërgoi topin në rrjetë.
Statistikat treguan më qartë diferencën në rrezikshmëri: Kanadaja regjistroi 1.32 xG, 12 goditje dhe 7 në kuadrat, ndërsa Afrika e Jugut pati vetëm 0.13 xG dhe një goditje në portë.
Në fazën e 1/8-ave, Kanadaja do të përballet me fituesen e çiftit Holandë-Marok.
