Komisioni Evropian u bëri thirrje shteteve anëtare të Bashkimit Evropian të veprojnë në kohë, në mënyrë të koordinuar dhe me një linjë të përbashkët, për të garantuar sigurinë e furnizimit me naftë dhe produkte nafte, në kushtet e trazirave të reja energjetike të shkaktuara nga kriza në Lindjen e Mesme dhe mbyllja e Ngushticës së Hormuzit.
Në një njoftim të publikuar sot, Komisioni thekson se paqëndrueshmëria në tregjet ndërkombëtare të energjisë kërkon monitorim të vazhdueshëm, shkëmbim të shpejtë informacioni dhe koordinim të ngushtë mes shteteve anëtare, në mënyrë që BE-ja të jetë e përgatitur për çdo skenar.
Komisioni nënvizon se BE-ja është e përgatitur mirë, falë detyrimit të shteteve anëtare për të mbajtur rezerva strategjike të naftës dhe për të pasur plane emergjence për përballimin e ndërprerjeve në furnizim.
Sipas Komisionit, shtetet anëtare të BE-së kontribuojnë me rreth 20% në lirimin e mbi 400 milionë fuçive naftë emergjente, në kuadër të mekanizmit të koordinuar nga Agjencia Ndërkombëtare e Energjisë (IEA).
Komisioneri për Energjinë dhe Strehimin, Dan Jørgensen, deklaroi: “Siguria e furnizimit energjetik të BE-së mbetet e garantuar. Por duhet të jemi të përgatitur për një ndërprerje potencialisht të zgjatur të tregtisë ndërkombëtare të energjisë. Prandaj duhet të veprojmë që tani. Dhe duhet të veprojmë së bashku, si një Bashkim i vërtetë. Vetëm përmes bashkëpunimit mund të jemi më të fortë dhe të mbrojmë më efektivisht qytetarët dhe bizneset tona.”
Në një letër drejtuar ministrave të Energjisë të BE-së, Komisioneri Jørgensen u kërkoi shteteve anëtare të forcojnë koordinimin përmes Grupit të Koordinimit të Naftës dhe Grupit të Punës për Sigurinë e Bashkimit Energjetik, si dhe të shqyrtojnë masa për uljen e kërkesës, me fokus të veçantë në sektorin e transportit, sipas rekomandimeve të IEA-së në planin me 10 pika për reduktimin e përdorimit të naftës.
Komisioni rekomandon gjithashtu që shtetet anëtare të shmangin masa që mund të rrisin konsumin e karburanteve, të kufizojnë qarkullimin e lirë të produkteve të naftës në tregun e përbashkët, apo të dekurajojnë prodhimin e rafinerive evropiane.
Po ashtu theksohet se qeveritë duhet të jenë në konsultim të vazhdueshëm si me shtetet fqinje, ashtu edhe me vetë Komisionin, për të ruajtur kohezionin në nivel evropian dhe për të mbrojtur funksionimin e tregut të brendshëm.
Në të njëjtin kuadër, Komisioni sugjeron shtyrjen e çdo mirëmbajtjeje jo urgjente të rafinerive, për të garantuar furnizim të mjaftueshëm në tregun e BE-së. Gjithashtu, vlerësohet se rritja e përdorimit të biokarburanteve mund të ndihmojë në zëvendësimin e lëndëve djegëse fosile dhe në lehtësimin e presioneve në treg.
