Një valë e fuqishme zjarresh ka përfshirë disa vende të Evropës, ndërsa temperaturat e larta dhe kushtet e thata po favorizojnë përhapjen e shpejtë të flakëve.
Situata paraqitet veçanërisht e rënduar në Francë, Kroaci, Gjermani, Greqi dhe Spanjë, ku ekipet e emergjencave po luftojnë me vatra të shumta dhe mijëra banorë e turistë janë evakuuar nga zonat e rrezikuara.
Në Francë, autoritetet kanë arrestuar 474 persona që nga fillimi i korrikut, të dyshuar për shkaktimin e zjarreve. Sipas Ministrisë së Brendshme franceze, 183 prej tyre janë të mitur, ndërsa rreth 70% e rasteve dyshohet se lidhen me zjarrvënie të qëllimshme dhe pjesa tjetër me ndezje aksidentale.
Një vatër e re është aktivizuar në Luglon, në rajonin Landes, ku vetëm gjatë së premtes janë evakuuar më shumë se 525 persona. Brenda më pak se 24 orësh, flakët kanë përfshirë rreth 1,100 hektarë pyll me pisha.
Për përballimin e situatës janë angazhuar rreth 500 zjarrfikës dhe gjashtë avionë zjarrfikës, ndërsa disa rrugë drejt zonës janë mbyllur për shkak të rrezikut.
Edhe Kroacia po përballet me një situatë të rëndë. Një zjarr ka përfshirë banesa në një zonë turistike, duke shkaktuar një viktimë dhe 40 të plagosur. Rreth 1,200 persona janë larguar nga zona e rrezikuar.
Në Gjermani, mbi 2,000 banorë janë evakuuar pasi një zjarr pyjor pranë fshatit Gey u përhap me shpejtësi. Ndërhyrja është komplikuar nga prania e municioneve të pashpërthyera të mbetura nga Lufta e Dytë Botërore.
Ndërkohë, në Greqi, turistë dhe pushues janë evakuuar nga plazhet dhe zonat e kërcënuara nga flakët, ndërsa edhe Spanja vijon të përballet me zjarre të fuqishme në disa rajone.
Vala e të nxehtit, thatësira dhe temperaturat e larta po krijojnë kushte të favorshme për përhapjen e zjarreve, duke vënë në vështirësi shërbimet e emergjencës në disa prej vendeve më të prekura të kontinentit.
