Policia e Shtetit njoftoi sot se gjatë ditë së nesërme më 10 tetor 2024, për shkak të vizitës zyrtare të Presidentit të Turqisë, Recep Tayyip Erdoğan, në Tiranë, do të aplikohen masa të rrepta sigurie që do të ndikojnë në qarkullimin e trafikut në kryeqytet dhe zonat përreth. Këto masa do të përfshijnë bllokimin e disa rrugëve kryesore, duke shkaktuar kufizime për qytetarët dhe drejtuesit e automjeteve.
Sipas njoftimit, nga ora 10:00 deri në 11:30 dhe nga ora 17:00 deri në 18:00, aksi i vjetër Kashar-Rinas do të jetë plotësisht i bllokuar. Qytetarët që kanë planifikuar të udhëtojnë drejt aeroportit këshillohen të përdorin autostradën e re Kashar-Rinas për të shmangur vonesat.
Bllokime të tjera do të prekin segmente të ndryshme rrugore në Tiranë, duke përfshirë:
– Rrugën nga Rinasi deri në Qafën e Kasharit dhe mbikalimin tek Casa Italia
– Nënkalimin te ish-sheshi “Shqiponja”
– Unazën e Re (Astir) dhe rrethrrotullimin e Saukut
– Rrugën e Elbasanit
Në qendër të Tiranës, bllokimet do të prekin bulevardin “Dëshmorët e Kombit”, nga ish-Hotel Dajti deri te sheshi “Nënë Tereza”, si dhe rrugët përreth, përfshirë: “Ismail Qemali”, “Papa Gjon Pali II”, “Ibrahim Rugova”, “Ukraina e Lirë”, “Zhan D’Ark”, dhe “Xhorxh Bush”.
Këto kufizime janë të lidhura me itinerarin e vizitës së Presidentit Erdoğan, i cili do të zhvillojë takime me autoritetet shqiptare. Policia e Shtetit ka apeluar për mirëkuptimin e qytetarëve duke paralajmëruar për bllokime të mundshme gjatë gjithë ditës, varësisht nga aktivitetet që do të zhvillohen.
