Detaje të reja janë mësuar nga ngjarja makabre që tronditi qytetin e Shkodrës këtë të enjte, ku një 64-vjeçar dyshohet se ka vrarë bashkëshorten e tij 54-vjeçare.
Sipas informacioneve paraprake, autori i dyshuar është identifikuar si Shtjefën Ziçi, i cili dyshohet se ka qëlluar me armë gjahu, tip çifte bashkëshorten e tij Bardhe Ziçi, 54 vjeçe. Si pasojë e plagëve të marra fatkeqësisht ajo nuk ka mundur që të mbijetojë.
Ngjarja e rëndë është regjistruar rreth orës 13:00, në lagjen “Mark Lula” të Shkodrës, duke shkaktuar tronditje te banorët e zonës. Menjëherë pas marrjes së njoftimit, në vendngjarje kanë mbërritur forca të shumta policie, të cilat kanë rrethuar zonën dhe kanë nisur hetimet për zbardhjen e plotë të rrethanave.
Pamje nga vendi i ngjarjes
Autori i dyshuar është vetëdorëzuar pas ngjarjes, ndërsa grupi hetimor vijon punën për të përcaktuar motivet dhe dinamikën e plotë të këtij krimi të rëndë.
Pamjet nga vendngjarja tregojnë praninë e një numri të madh efektivësh policie dhe zonën e rrethuar, ndërsa autoritetet vijojnë veprimet hetimore për mbledhjen e provave dhe dokumentimin e ngjarjes. Për më shumë detaje pritet një reagim zyrtar nga Policia e Shkodrës për të kuptuar më tepër detaje lidhur edhe me shkaqet që çuan në këtë krim fatal.
