Strukturat e DVP Shkodër kanë finalizuar fazën e katërt të operacionit policor të koduar “Neonët 4”, në kuadër të goditjes së veprimtarisë kriminale të kultivimit të bimëve narkotike në ambiente të mbyllura me anë të llambave. Me këtë fazë, shkon në 7 numri i ambienteve të zbuluara dhe goditura gjatë operacionit.
Gjatë ndërhyrjes policore, u arrestua në flagrancë shtetasi Gjovalin Binaku 22 vjeç, banues në Laç, Vau i Dejës, i cili kishte marrë me qira një banesë në Velipojë dhe e kishte përshtatur për kultivimin dhe tharjen e bimëve narkotike kanabis.
Po ashtu, u ndalua shtetasi Robert Vata, 25 vjeç, banues në Shkodër, ndërsa nisi procedimi penal për shtetasit A. U., 50 vjeç, dhe Gj. T., 59 vjeç, banues në Velipojë, punonjës të OSHEE-së, të dyshuar për veprën penale “Shpërdorimi i detyrës”, kryer në bashkëpunim.
Nga kontrollet në banesën e përshtatur për veprimtarinë kriminale, Policia sekuestroi 308 bimë të dyshuara narkotike kanabis, 85 gramë lëndë narkotike të tharë, 122 pajisje elektrike për kultivim, si dhe 4 aparate celularë. Ndërkohë, nga kontrolli në banesën e shtetasit R. V. u gjetën dhe u sekuestruan 3 llamba dhe një përforcues grushti.
Operacioni u zhvillua nga shërbimet e Komisariatit të Policisë Shkodër, në bashkëpunim me Seksionin për Hetimin e Narkotikëve, Forcën Operacionale dhe njësinë “Shqiponjat”.
Policia njofton se puna vijon për dokumentimin e plotë të kësaj veprimtarie kriminale, ndërsa materialet procedurale i janë referuar Prokurorisë së Shkodrës për veprime të mëtejshme.
