Ka nisur fluksi i parë i pasagjerëve në Portin e Vlorës, ku shumë shqiptarë që jetojnë dhe punojnë në emigrim kanë zgjedhur të kalojnë festat e fundvitit pranë familjeve të tyre në Shqipëri, veçanërisht në qytetin bregdetar të Vlorës.
Vetëm në orët e para të mëngjesit të sotëm, në port janë regjistruar 288 pasagjerë, ndërsa bashkë me ta kanë hyrë edhe 74 automjete.
Sipas të dhënave zyrtare, kjo fundjavë ka shënuar numrin më të lartë të pasagjerëve për gjithë muajin dhjetor, duke treguar se tashmë ka nisur fluksi i pritshëm i kthimeve për festat e fundvitit.
Autoritetet portuale bëjnë me dije se pritet që fluksi të intensifikohet duke nisur nga data 24 dhjetor dhe të vijojë deri në ditën e fundit të vitit.
Për shkak të fluksit, pritet edhe shtimi i masave, rritja e numrit të personelit dhe hapja e më shumë sporteleve, me qëllim shmangien e radhëve dhe lehtësimin e përpunimit të pasagjerëve.
