Një person ka mbetur i vrarë mbrëmjen e kaluar në rrugën “Sali Nivica” në Prishtinë, pas të shtënave me armë zjarri që ndodhën rreth orës 20:30. Viktima është identifikuar si Agron Hajdari, i njohur me nofkën “Radulla”, emër i njohur për komunitetin sportiv si pjesë e tifogrupit “Plisat”.
Sipas autoriteteve, njësitet policore dhe ekipi mjekësor kanë dalë menjëherë në vendin e ngjarjes, por viktima nuk ka arritur t’u mbijetojë plagëve.
Kryeprokurori i Prishtinës, Zejnullah Gashi, konfirmoi identitetin e viktimës, ndërsa Policia e Kosovës bëri të ditur se hetimet për zbardhjen e plotë të rastit janë duke vazhduar.
Hajdari ishte emër i njohur edhe për organet e rendit, pasi në të kaluarën ishte përmendur për veprimtari kriminale, përfshirë raste të lidhura me narkotikë. Deri më tani nuk ka informacione zyrtare lidhur me autorët apo motivet e atentatit.
Vrasja e Hajdarit ka shkaktuar reagime të shumta, veçanërisht nga tifogrupi “Plisat”, ku ai kishte qenë pjesë për më shumë se dy dekada. Në një reagim publik, grupi shprehu dhimbjen për humbjen e anëtarit të tyre, duke theksuar kontributin e tij për tribunën, klubin dhe Kombëtaren ndër vite.
“Kujtimi për të do të mbetet gjithmonë i gjallë. Pusho i qetë Goni! Ultrasit nuk vdesin kurrë”, thuhet në mesazhin e ngushëllimit.
