Vëllai i ish-peshëngritësit të njohur me origjinë shqiptare, Pirro Dhima, është arrestuar mëngjesin e së premtes në Athinë, nën dyshimin për furnizimin e sportistëve me substanca të ndaluara dopingu.
Bëhet fjalë për 58-vjeçarin Odise Dhima, në banesën e të cilit dhe në qendrën sportive që drejtonte në rajonin e Atikës, policia ka zbuluar sasi të konsiderueshme substancash stimuluese, të dyshuara si doping, të cilat dyshohet se u jepeshin sportistëve për të rritur artificialisht rezultatet e tyre në gara.
Sipas hetimeve, 58-vjeçari dyshohet se e ushtronte këtë aktivitet prej më shumë se 14 vitesh. Autoritetet greke bëjnë me dije se, që nga prilli i vitit 2024, ai furnizonte sportistë me substanca të ndaluara.
Hetimi ka zbuluar gjithashtu një rast kur një sportisti të mitur i ishte dhënë një substancë e ndaluar nga lista e Agjencisë Botërore Antidoping (WADA), gjatë një gare sportive. Për këtë rast, si trajneri, ashtu edhe sportisti ishin ndëshkuar më herët me përjashtim nga gara dhe aktivitetet sportive.
Gjatë kontrolleve të ushtruara në banesë dhe në ambientet sportive në Atikë, policia sekuestroi 871 njësi medikamentesh dhe substancash të paligjshme dopingu, në formë tabletash dhe ampulash. Sipas autoriteteve, produktet nuk ishin të miratuara nga Organizata Kombëtare Greke e Barnave (EOF) dhe paraqisnin rrezik për shëndetin.
Në cilësinë e provave materiale u sekuestruan gjithashtu:
15 mijë euro para të gatshme;
17 kartela sportistësh;
Shënime të shkruara me dorë;
Një telefon celular, i cili do t’i nënshtrohet ekspertizës për të zbuluar prova të tjera të mundshme.
Operacioni u krye nga Drejtoria për Luftën kundër Krimit të Organizuar, në bashkëpunim me Organizatën Greke Antidoping (EOKAN) dhe Organizatën Kombëtare të Barnave (EOF).
Pas arrestimit, Odise Dhima është dërguar në prokurori për procedurat përkatëse, ndërsa pritet që gjykata të vendosë për masën e sigurisë ndaj tij.
Hetimet për këtë çështje vijojnë, ndërsa autoritetet greke po përpiqen të zbardhin përmasat e aktivitetit të dyshuar dhe personat e tjerë që mund të jenë përfshirë në të./tch
